तुझी तू रहा!
कुणी नसलं तरी चालेल!
तुझी तू रहा
फक्त तुझ्याच डोळ्यांनी
तुझे जग पहा...
हास जेव्हा ओठ हसतील
रड जेव्हा डोळे रडतील.
हसण्यावर, अश्रूंवर,
तुझी सत्ता ठेवून रहा...
काटे जरी बोटी रुततील
फुफाट्यात पावले जळतील
फक्त तुला आवडलेलीच
फुले वेचीत रहा...
मुसळधार सरी येतील
तुझा अंगार विझवू बघतील
विझणाऱ्या ठिणगीवर
फुंकर घालीत रहा...
उसने मुकुट कुणी घालतील
जरी अंगरखे पेहरून सजतील
तुझ्या सुती वस्त्राचा
अभिमान तू वहा...
मग कुठेतरी कमळे फुलतील
सुगंध घेऊन वारे येतील
तुझ्या मोकळ्या गळ्यातले
गीत तोवर गात रहा...
कवयित्री - संजीवनी बोकील
No comments:
Post a Comment